Eritrea ERi-TV Editorial | ሓተታ Hateta (April 9, 2016)
=========================================================================================================================
‘ርብዒ ዘመን ኣብ መኸተን ልምዓትን!’ ቴማ ናይ 09 ሚያዝያ 2016 ሓተታ ህግደፍ’ዩ።
መሲናስ | April 12, 2016 | sallina.com
ኣቤት! ዓጀብ! ወዳጀ ልምዓት ህግደፍ!
ነቲ ርብዒ ዘመን ኲናትን ዕንወትን
እምበኣር ኢልኩሞ መኸተን ልምዓትን
ነቲ ርብዒ ዘመን’ወ ናይ ግፋን ማእሰርትን
ኣምበኣር ኢልኩሞ ክብርን ሓርነትን!?
ነቲ ርብዒ ዘመን *ዘለማን ውርደትን
እምበኣር ኢልኩሞ መሰልን ክብረትን
ነቲ ርብዒ ዘመን’ወ ስደትን ፍልሰትን
እምበእር ኢልኩሞ ጥርናፈን ውህደትን!?
ነቲ ርብዒ ዘመን ሓዘንን ጸልማትን
እምበኣር ኢልኩሞ ብርሃንን *ሽንሆትን
ነቲ ርብዒ ዘመን ድሕረትን ልምሰትን
እምበኣር ኢልኩሞ ምዕባለን ዕብየትን!?
ነቲ ርብዒ ዘመን’ወ ጊላነትን ባርነትን
እምበኣር ኢልኩሞ ባህታን ሓርነትን
ነቲ ርብዒ ዘመን ጥምየትን ጽምኣትን
ኣምበኣር ኢልኩሞ ጽጋብን ርውየትን!?
ነቲ ርብዒ ዘመን መዝመትትን ርስየትን
እምበኣር ኢልኩሞ መኽሰብን ሕውየትን
ንብረት ህዝቢ ምዕናው ትካላትን ቤትን
እምበኣር ኢልኩሞ ልምዓትን ህንጸትን!?
ነቲ ርብዒ ዘመን እገዳን ፍሽለትን
እምበኣር ኢልኩሞ ሓበንን ኩርዓትን
ነቲ ርብዒ ዘመን ዕንደራን ሽፍትነትን
እምበኣር ኢልኩሞ ምሕደራን ስርዓትን!?
ነቲ ምክልባት ህዝብን ተጋደልትን
እምበኣር ኢልኩሞ መኸተን ዓወትን
ነቲ ርብዒ ዘመን ማሕለኻን *እልበትን
እምበኣር ኢልኩሞ ራህዋን ቅሳነትን!?
እቲ ዚኸዘንኩሞ ማይ ራህያን ዲጋታትን
ፍረ ከይተረኽቦ ምህርትን እቶትን
ብከንቱ በሊዑ ገንዘብን ጉልበትን
ነበረ’ኮ ኮይኑ ብጸሓይን ድበትን!
ነቲ ርብዒ ዘመን ናይ ቅንጸላን ሞትን
እምበኣር ኢልኩሞ ምቾትን ህይወትን
ኣታ የብልኩምንድዩ *ኣስሓኮን ሕፍረትን
ልብና’ኮ ኣዕዊርኩሞ ብጓይላን ሓሶትን!
ቊሩብዶ የብልኩምን’ዩ ሰሃሮን ሓልዮትን
ከምዚ ኣሎድዩ መራሒ ንህዝቡ ዚብትን!?
ኤርትራና ክሓልፈላ፡ ስርዓት ምልኪ ንእለየላ!
ሓውኹም መሲናስ 11/04/2016
ትርጉም ዘይዝውቱራት ቃላት፥
*ዘለማን= ጭቆናን መርገጽትን
*ሽንሆትን= ፍሳሃን ሓጐስን
*እልበትን= ሓሳርን መከራን
*ኣስሓኮን= ከይብሉኒን